السبت، 21 يوليو 2012

سفرة رمضان لليوم الثالث” محشى ورق عنب وريش ضانى وسلطة مرطبة ومنعشة وقطايف مقرمشة بطريقة جديدة”


النهاردة ميعادنا مع المحشى…
ولا أحلى منه خاصة محشى ورق العنب هنعمله النهاردة مع بعض مع ريش اللحم
طعمه خطييير وكمان هنقدم سلطة الزبادى المرطبة حلووووووة أوى مع ارتفاع الحرارة
وكمان هنعمل مع بعض البطاطس المشوية والعصير المنعش …
سفرتنا النهاردة سهلة التحضير  وكتييير شهية ولذيذة مستنية ايه يلا بينا نشوف سفرتنا.

الــإفطــــار:
المقادير:
كوب ونصف أرز مصري مغسول
1/ 2 كيلو ريش ضاني
1/ 4 كيلو ورق عنب طازة
4 ملعقة كبيرة زيت زيتون
بصلة كبيرة مفروم ناعم
1/ 4 كوب بقدونس مفروم
1/ 4 كوب شبت مفروم
2 ثمرة طماطم مُقطّعة مكعبات صغيرة
4 ملعقة كبيرة صلصة طماطم
1/ 2 ملعقة صغيرة شطة
ملعقة صغيرة نعناع جاف
1/ 4 كوب عصير ليمون
ملعقة صغيرة كمون
2 كوب شوربة
ملح وفلفل
بهارات

أحلى طريقة لمحشى ورق العنب بالريش الضانى
طريقة التحضير:
1- شوّحي الريش في ملعقتين زيت لمدة 10 دقايق، وتبّليها بالملح والفلفل.
2- اغسلي ورق العنب كويس وحطّيه في ميه مغلية لمدة 5 دقائق علشان يستوي، وبعد كده ارفعيه، وشيلي منه العروق.
3- اخلطي الأرز مع البصل، والبقدونس، والشبت، والطماطم، وصلصة الطماطم، والنعناع، والشطة، والكمون، وتبّليه بالملح والفلفل والبهارات وملعقتين زيت مع التقليب لغاية ما كل المكونات تتجانس.
4- احشي ورق العنب بالخلطة اللي عملتيها، بحيث يكون الجزء الناعم من ورق العنب للخارج.
5- هاتي حلة وحطّي فيها من تحت حلقات طماطم وبصل وعروق ورق العنب، وبعد كده رصّي الريش، ومن فوق رصّي محشي ورق العنب.
6- اسقي المحشي بالشوربة وعصير الليمون، وبعد كده اضغطي على ورق العنب بغطاء صغير، وبعد كده غطّي الحلة كويس، وحطيها على نار عالية لغاية ما الشوربة تبدأ تغلي، وبعد كده هدّي النار، وسيبيه لغاية ما المحشي يستوي.
7- سيبي المحشي يبرد، وبعد كده اقلبيه في طبق التقديم وزيّنيه بشرائح الليمون.



سلطة الزبادى بالخيار “مرطبة ومهضمة”
المقادير:
3 ثمرات خيار
3 علب زبادي
4 فصوص ثوم مفرومين
ثمرة فلفل أخضر مفروم
1/ 4 ملعقة صغيرة ملح
1/ 2 ملعقة كبيرة نعناع أخضر مفروم
طريقة التحضير:
1- اغسلي الخيار كويس، وقطّعيه قطع صغيرة جدا،
وبعد كده اخلطي كل المكونات مع بعضها، وزيّنيها بورق النعناع الأخضر.

العصـــائــر والحلــويـــات

عصير الخوخ والمشمش المنعش
المقادير:
4 ثمرات خوخ
8 ثمرات مشمش
2 كوب عصير برتقال
سكر
طريقة التحضير:
1- اغسلي الخوخ والمشمش كويس، وقطّعيهم قطع صغيرة، وبعد كده اخلطيهم مع كمية مناسبة من السكر
انقعيهم في المية السخنة لمدة 6 ساعات،
وبعد كده اضربي الخليط ده مع عصير البرتقال في الخلاط،
وبعدين صفّيه كويس، وحطّيه في الثلاجة، وقدّميه بارد.


قطايف مقرمشة بطريقة جديدة
المقادير:
١٢ قطعة خبز توست
١/٢ كوب جوز مجروش
١ ملعقة كبيرة صنوبر
٢ ملعقة كبيرة سكر
١ ملعقة صغيرة قرفة
٢ ملعقة كبيرة جبن كريمي لين
للقلي زيت ذرة
للتقديم شيرة(قطر، شربات)، جوز مطحون

طريقة التحضير:
1. باستعمال النشابة مدي شرائح الخبز لتصبح رقيقة بسماكة ٤ ملم تقريبا.
2. باستعمال قطاعة بسكويت مقاس ٥ بوصة تقريبا قطعي الخبز إلى دورائر أو أقراص.
3. في طبق عميق ضعي الجوز، الصنوبر، السكر والقرفة، قلبي المواد لتختلط جيدا.
4. باسعتمال سكين معدنية عريضة إدهني حواف أقراص الخبز بالجبن الكريمي.
5. ضعي في وسط كل قرص مقدار ملعقة كبيرة او ملعقتين من الحشو. أقفلي القرص على الحشو ليصبح بشكل نصف دائرة. إضغطي على الحواف كي تلتصق.
6. في مقلاة عميقة ضعي مقدار من الزيت بحيث يكون بارتفاع ٢ بوصة تقريبا. ضعي المقلاة على نار متوسطة ليسخن الزيت. يمكنك استعمال المقلاة الكهربائية إذا توفرت لديك.
7. ضعي عدة أقراص من القطايف في الزيت وانتظري قليلا ثم قلبيها لتصبح ذهبية اللون.
8. أخرجي القطايف من الزيت وضعيها مباشرة في الشيرة. قلبي القطايف في الشيرة. قلبي القطايف في الشيرة لعدة ثواني ثم أخرجيها بملعقة ذات ثقوب وضعيها في طبق تقديم. قدمي القطايف دافئة.


السحـــور:
المقادير:
4 ثمرات بطاطس
2 ملعقة زيت زيتون
2 ملعقة صغيرة ثوم مفروم
½ كوب عصير ليمون
بقدونس طازج
ملح وكمون
قطعة زبدة
طريقة التحضير:
1- قطّعي البطاطس شرائح عريضة، واغسليها كويس بالميه والخل.
2- تبّلي البطاطس بالملح وادهنيها بشوية زيت، ولفّيها في ورق فويل، ودخّليها الفرن علشان تستوي كويس.
3- بعد ما تتأكّدي إن البطاطس استوت، طلّيعها من الفرن، وحطّي عليها الزبدة.
4- حضّري الصوص اللي هتحطّيه على البطاطس عند التقديم، بإنك تخلطي الثوم المفروم مع الكمون والبقدونس وملعقة زيت وعصير الليمون، وقلّبيهم مع بعض كويس أوي.
5- عند التقديم، ضيفي الصوص على البطاطس وقدّميها مع أنواع الجبن اللى بتحبيها والخبز.
وبالصحة والهنا…

يلا جربيها وقدمى سفرة رمضانية مميزة بلمساتك وطريقتك الخاصة , استنونى بكرة وسفرة جديدة لذيذة وشهية وزى ما قولت لكم لو عندكم وصفة عاوزين تحضروها ومش عارفين طريقتها تعالوا قولوا عليها وأنا أقدمهالكم … اسيبكم فى رعـــاية الله.

0 التعليقات:

إرسال تعليق